પુરુષે લગ્ન માત્ર એક સુંદર સ્ત્રી સાથે જ નથી કરવાના પણ…..

આપણે ત્યાં કહેવત છે કે, ‘પુરુષની કમાણી જાેવાય અને સ્ત્રીની સુંદરતા.’ પણ આજકાલના યુવાનો આ કહેવતના ફર્સ્ટ હાફને ઘોળીને પી જતા હોય છે અને સેકેન્ડ હાફને વળગી રહેતા હોય છે. કમાણી હોય કે ના હોય પત્ની તો સુંદર જ જોઈએ. એક કડવી પણ સો ટચના સોના જેવી સચ્ચાઈ એ પણ છે કે પુરુષો બહું જ જલ્દી પોતાની પત્નીથી ધરાઈ જતા હોય છે. જે સ્ત્રી એને સ્વર્ગની તમામ અપ્સરાઓ કરતા સૌથી વધારે સુંદર લાગતી હોય છે એ જ સ્ત્રી લગ્નના થોડા જ સમય બાદ કદરૂપી લાગવા માંડે છે.  રાજરાણી બનાવીને રાખવાના સપના બતાવીને એ સ્ત્રી સાથે પરણતો હોય છે અને પછી એક દાસી જેમ રાખતો હોય છે. સ્ત્રીને પરણી લાવ્યા એટલે જાણે ગુલામ બનાવીને લાવ્યા. જાણે એ ઘરના ઢસરડા કરવા આવી હોય એવો વ્યવહાર થાય છે એની સાથે. ઘર, બહાર, સાસુ-સસરા, નણંદ-દિયર, બાળકો બધાને સ્ત્રી એકલે હાથે સંભાળતી અને સાંભળતી હોય છે છતા ઘરમાં એનું કોઈ નથી સાંભળતુ. એની ભાવનાઓ, એના અરમાનો, એના સપનાઓ તરફ કોઈ નજર સુદ્ધા નથી નાંખતુ.

ખરેખર તો સ્ત્રી સન્માનને પાત્ર છે. એ આખા ઘર પરિવારને સાચવે એ બદલ એને માન સન્માન આપવું જાેઈએ. લગ્ન કરીને એ એનો પરિવાર છોડીને આવી હોય છે એ જ મોટી વાત છે. આપણે કોઈના ઘેર એક રાતથી વધારે રોકાઈ નથી શકતા એ ન ભુલવુ જોઈએ. સ્ત્રી આપણને પરણીને આવી એનો અર્થ એ નથી કે એ આપણી ગુલામ છે. દરેક પુરુષે યાદ રાખવું જોઈએ કે એણે લગ્ન માત્ર એક સુંદર સ્ત્રી સાથે જ નથી કરવાના પણ એની ભાવનાઓ, એના અરમાનો, એના સપનાઓ અને એની લાગણીઓ સાથે પણ કરવાના હોય છે.

સ્ત્રીએ લગ્ન માત્ર પુરુષ સાથે જ નથી કરવાના પણ…….

સ્ત્રી લગ્ન કરીને પિતાના ઘરની બહાર પગ મુકે છે એ સાથે જ એના માટે પિતાનું ઘર પરાયુ બની જતુ હોય છે. લગ્ન બાદ સ્ત્રીનો બીજો જન્મ થતો હોય છે. એક નવા જ ઘર, નવા જ લોકો, નવી જ રહેણી કરણી અને નવી જ દુનિયા સાથે એણે તાલમેલ બેસાડવાનો હોય છે. લગ્નના દિવસથી સાસરુ અને સાસરિયા જ એનુ સર્વસ્વ થઈ જતા હોય છે. એ દિવસથી પિતાના ઘરમાં અલ્લડ થઈને ઘુમતી છોકરી છોકરી મટીને એક જવાબદાર સ્ત્રી બની જતી હોય છે. એને પતિના પરિવારને પોતાનો પરિવાર  બનાવીને એમની સારસંભાળ રાખવાની હોય છે. સ્ત્રીના લગ્ન માત્ર પતિ સાથે જ નથી થતા પણ એના પરિવારના એક એક સભ્ય સાથે થતા હોય છે.એના પરિવારના એક એક સભ્ય સાથે એનો સંબંધ બંધાતો હોય છે.

પણ મોટે ભાગે પૈસા અને સ્માર્ટ યુવક જાેઈને લગ્ન કરી લેતી આજની યુવતીઓ કોણ જાણે કેમ આ સચ્ચાઈ જાણતી હોતી નથી. મોટાભાગની યુવતીઓ એમ જ સમજે છે કે લગ્ન એટલે પતિ અને પત્નીનો સંબંધ બસ. અને એના કારણે જ લગ્ન બાદ આજની યુવતી સંયુક્ત પરિવાર સાથે એડજેસ્ટ કરી શકતી હોતી નથી. ક્યાંક ક્યાંક તો માત્ર સાસુ સસરા સાથે જીવન વિતાવવાનું પણ યુવતી માટે દુષ્કર બની જતુ હોય છે. એના લીધે પતિ પત્ની વચ્ચે ઝઘડાઓ શરૂ થઈ જાય છે અને આખરે ઘર ભાંગે છે. માટે આજની દરેક યુવતીએ એ યાદ રાખી લેવાની જરૂર છે કે સ્ત્રીએ લગ્ન માત્ર પુરુષ સાથે નથી કરવાના પણ એના પરિવાર સાથે પણ કરવાના હોય છે.

કુશળ માણસોનો એક જીવન મંત્ર છે. હજુ વધારે સારુ. સ્ટીલ બેટર! Still better

કુશળ માણસોનો એક જીવન મંત્ર છે. હજુ વધારે સારુ. સ્ટીલ બેટર! Still better જે માણસો કાર્યકુશળ છે એ માણસોનું સમગ્ર કોન્સન્ટ્રેશન વસ્તુને બેટર બનાવવામાં જ વપરાય છે. એ નાની એવી ખામી પણ ચલાવી લેતાં નથી. પ્રત્યેક વસ્તુને સુધારવામાં એમને વધારેને વધારે રસ છે. અને જ્યાં સુધી વસ્તુ શ્રેષ્ઠ ના બને ત્યાં સુધી એ લોકો એને છોડતા પણ નથી અને કંટાળતા પણ નથી.

કાર્યકુશળ માણસ કામથી કદી કંટાળતો નથી કે થાકતો નથી. એનું કામ જ એનો પહેલો પ્રેમ છે. એ લોકો એમના મંત્રને જ વળગી રહેતા હોય છે અને જીવનના દરેકે દરેક ક્ષેત્રમાં હજુ વધારે સારુ કઈ રીતે થઈ શકે, એની જ ભાંજગડમાં તેઓ રહેતા હોય છે.

આ માણસોની ખાસિયત એ હોય છે કે જીવનનો કોઈ પણ પ્રશ્ન એમની પાસે આવે એનો ઉકેલ થયા વિના નથી રહેતો. આપણે એવા કાર્યકુશળ માણસોની યાદીમાં આપણું નામ નોંધાવા પ્રયત્ન કરીએ તો એક કાંકરે બે પક્ષી જીવી જશે. એક તો આપણું પોતાનું જીવનધોરણ ઉંચુ આવશે અને બીજી આપણી  કુશળતા થકી સમાજને પણ કંઈક મળશે.

Life-મંત્ર…..

કોઈ કાર્ય બગડે એમાં માણસનો વાંક નથી હોતો, એની બીનકુશળતાનો વાંક હોય છે