નિષ્ફળતાથી ડર લાગે છે? | નિષ્ફળતા માંથી જે અનુભવ મળે છે તે દુનિયાની કોઇ યુનિવર્સિટી તમને ભણાવી શકશે નહી. અને હા યાદ રાખો જીવન માત્ર સફળતા અને નિષ્ફળતા આ બે જ શબ્દનું બનેલું નથી, સેંકડો શબ્દ છે જે તમેન આના કરતા પણ વધારે સુખી રાખશે…માટે આ લેખમાં નિષ્ફળતાની કેટલીક એવી વાતો જે વાંચશો તો તમને લગભગ નિષ્ફળતાથી ડર નહી લાગે…આ જીવનનો એક ભાગ છે

હારવાનો ડર લાગે છે?

જો હારવાનો ડર લાગતો હોય તો જીતવાની ઇચ્છા ન રાખવી જોઇએ । આપણે જેવુમ વિચારીએ છીએ એવુ જ થાય છે. આ વાક્ય તમે અનેક મોટિવેશનલ સ્પીકરના મુખેથી સાંભળ્યું હશે. આ વાત વિજ્ઞાનીક સંદર્ભે સાબિત થઈ છે. એક સિક્રેટ્સ નામની ડોક્યુમેન્ટ્રી પણ છે. જોઇ લેજો. માટે કોઇ પણ શરૂઆત કરો નિષ્ફળતાના ભય સાથે ન કરો, પોઝિટિવ રહો. ભારતીય ટીમનો કેપ્ટન જો આઉટ થવાના ભય સાથે મેદાને ઉતરે તો એ એક પણ પરફેક્ટ શોટ મારી જ નહી શકે કેમ કે તેના મનમાં આઉટ થવાનો ભય રહે છે. એટલે જ મોટાભાગના કોચ કહેતા હોય છે કે ખુલીને રમો. આ સત્ય છે. માટે કોઇ પણ ફિલ્ડ હોય ડરને બાજુ પર મૂકી માત્ર પોઝિટિવ વિચાર સાથે અને જીતવા મેદાને ઉતરો…

એસી વાણી બોલીએ…

જો તમારે ખૂબ સુંદર જવાબ જોઇતો હોય તો ખૂબ ખૂબ સુંદર રીતે પ્રશ્ન પૂછો | આ તો બહું સ્પષ્ટ વાત છે તમે જેવો વ્યવહાર કરશો તેવો વ્યવહાર જ સામેવાળો કરશે. એટલે તમારી વાણી ઉપર છે કે તમારે કેવો જવાબ જોઇએ છે. તોછડો જવાબ ન જોયતો હોય તો પ્રેમથી પુછો, પ્રેમથી જ સાચો અને ગમે એવો જવાબ મળી શકે છે…

વિચારો અને તમારો દેખાવ

યાદ રાખો તમે એવા જ દેખાવ છો જેવું તમે વિચારો છો । ક્યાંકને ક્યાંક આપણા જે વોચારો હોય છે તે આપણા કાર્યમાં દેખાતા હોય છે. એવી જ રીતે ચહેરો પણ બોલે છે. ઘણીવાર તમારી આંખો બધુ કહી દે છે. બોડી લેગ્વેજની વાત તમે સાંભળી હશે. બસ આ બોડી લેગ્વેજના માસ્ટરો તમારા દેખાવ અને હાવભાવથી જ તમને પરખવાની કોશિશ કરે છે. એ મોટે ભાગે સાચા એટલા માટે પડે છે કારણ કે તમે જ તમારા હાવ-ભાવથી તેને કહી દો છો. આપણા વિચાર આપણી બોડી લેગ્વેજ થકી પણ બહાર આવતા હોય છે.

નિષ્ફળ પ્રયત્નો…

દરેક સફળતાની પાછળ અનેકવાર કરેલા નિષ્ફળ પ્રયત્નો કારણરૂપ હોય છે । એવું કહેવાય છે કે જે માણસ નિષ્ફળ ઘણીવાર ગયો હોય તેની સલાહ માનવી જોઇએ કેમ કે તેણે તે માર્ગ પર ચાલવાનો અનુભવ મેળવ્યો છે. મોટિવેશનલ સ્પીકરો પણ વારંવાર પ્રયત્નો કરતા રહેવાનું એટલા માટે જ કહે છે. ભૂલ એકવાર થાય વારંવાર ન થાય. અને થયેલી ભૂલમાંથી શીખવા જ મળે. માટે યાદ રાખો તમે ખૂબવાર નિષ્ફળ ગયા પછી જે સફળતા મળે છે તે લાંબો સમય સુધી તમારી સાથે રહે છે કેમ કે તેમે નિષ્ફળતાને પચાવીને પણ તમે તમારો રસ્તો જાતે બનાવ્યો છે. આ રસ્તાની તમને બધી જ સમજણ છે. માટે સફળતા કરતા નિષ્ફળતામાંથી તમે ઘણું બધું શીખી શકો છો, માટે નિષ્ફતાની હારો નહી નિષ્ફળતાથી તમારું ઘડતર થાય છે

તમે નિષ્ફળ કેમ જાવ છો?

નિષ્ફળતાની ચિંતા ન કરો, નિષ્ફળતા કેમ મળી તેના પર વિચારો, શું ન કર્યુ જેનાથી નિષ્ફળતા મળી…ઘણીવાર આપણે નિષ્ફળતાથી હારી જઈ પ્રયત્ન કરવાનું જ બંધ કરી દઈએ છીએ. પણ એવું કરવાનું નથી. આપણે તો મળેલી નિષ્ફળતાનો અનુભવરૂપી ફાયદો લેવાનો છે અને આગળ વધવાનું છે. નિષ્ફળ ગયા પછી વિચારો કે આવું કેમ થયું? ક્યા કચાશ રહી ગઈ. બસ એ મુદ્દાને પકડો અને બીજા પ્રયત્નમાં એ ભૂલ ન થાય તેનુમ ધ્યાન રાખો.

નિષ્ફળ જાવ તો પહેલા આ વિચારો

નિષ્ફળ જાવ તો પોતાની જાતને એક પ્રશ્ન પૂછો કે મે કઈ કઈ જગ્યાએ આળસ કરી છે, શું કરવા જેવું હતું પણ મે કર્યુ નથી । નિષ્ફળતા પાછળ મોટે ભાગે આળસ જવાબદાર હોય છે બાકી આ દુનિયામાં એક્વાત નક્કી છે કે માનવ ધારે એ કરી જ શકે છે. માટે જો નિષ્ફળ ગયા હોવ તો પોતાની જાતને પૂછો કે મેં આળસ કરી હતી. સમજાય જશે.

મહેનત…મહનત અને મહેનત

જીવનમાં કશું સરળતાથી નથી મળતું, નિષ્ફળતા માટે પણ નક્કી તમે ખૂબ મહેનત કરી હશે, એ મહેનતમાંથી શીખો । એકવાત સમજી લો સફળતા માટે અથાક પરિશ્રમનો સિવાય બીજો કોઇ વિકલ્પ નથી. મહેનત વગર અહીં કશું જ મળતું નથી. હા મહેનત સાચી દિશામાં કરવાની છે.

પ્રયત્નથી જ નસીબ બદલી શકાય છે

સફળતા કે નિષ્ફળતા તમારા હાથમાં હોતી નથી માત્ર અને માત્ર અથક મહેનત અને અણથક પ્રયત્ન જ તમારા હાથમાં હોય છે. દરેક સફળતા પાછળ થોડું નસીબ પણ હોય છે પણ એ આપણા હાથમાં નથી આપણા હાથમાં માત્ર મહેનત છે તો આપણે એના પર જ ધ્યાન આપવાનું રહે છે. એક સુવિચાર છે કે માણસ પોતાના અણથક પ્રયત્નોથી અને મહેનથી ધારે તે પોતાનું નસીબ બદલી શકે છે.

પોઝિટિવ રહો…

જીવનમાં ગમે તેટલું અંધારું કેમ ન હોય, પોતાની બાજુ અજવાળું કરો અને તેમાથી સફળ થવાની સંભાવનાઓ તપાસો, નક્કી અંધારું અજવાળું લાગશે । આ ગ્લાસ અડધો ખાલી છે કે ભરેલો તેના જેવી વાત છે. પોઝિટિવ વાત સાથે આગળ વધશો તો સફળ થવાના ચાન્સ વધારે છે બાકી નેગિટિવ વિચાર સાથે જીવશો તો તમે કોઇ કામ જ શરૂ નહી કરી શકો. માટે જીવનમાં તમારી પાસે જે છે તેને ચકાસો અને તેને જ અજવાળું ગણી આગળ વધો. જીત તમારી જ થશે.

જીવન અને બે શબ્દો

યાદ રાખો જીવન માત્ર સફળતા અને નિષ્ફળ આ બે જ શબ્દનું બનેલું નથી, સેંકડો શબ્દ છે જે તમેન આના કરતા પણ વધારે સુખી રાખશે…સાચુ કે નહી. માર્કેટિંગની આ દુનિયાએ આ બે શબ્દોને જ મહત્વ આપ્યું છે માટે તેનું મહત્વ આપણા માટે વધી ગયું છે. તમારી જે માતૃભાષા હોય તેનો શબ્દકોશ લઈને જોઇ લો અનેક શબ્દો છે જે તમારા જીવનને બદલી નાંખશે.

અગવડતામાં જ સફળતા…

જ્યારે તમે અગવડમાં હો, અભાવમાં જીવતા હોવ ત્યારે યાદ રાખો કે એ જ સમય તમારા માટે કઈક કરી બતાવવાનો છે, યાદ રાખો અગવડતા જ વ્યક્તિને કંઇક કરી બતાવવાની ઘગશ આપે છે. અગવડાજ વ્યક્તિનું સાચુ ઘડતર કરે છે. બાકી જો બધી જ સગવડ હોય તો માનવ સ્વભાવ મુજબ એ પછી આળસુ જ બને છે. માટે વિચારો અને આગળ વધો.

‘ઈંક’ નામની એક કેનેડિયન રિસર્ચ કંપનીએ આવી સાત આદતોને ટાંકી છે. જે તમને અમીર Success બનતા રોકે છે. તો આવો જાણીએ એ સાત આદતો વિશે…એકવાર વાંચવા સમજવા જેવી છે

ખૂબ બધા રૂપિયા, આલીશાન ઘર, ગાડી આ બધુ જ સૌ કોઈ માટે સ્વપ્ન હોય છે. દુનિયાના હરેક વ્યક્તિને ધનવાન બનવું છે. પરંતુ બધા ધનવાન બની શકતા નથી. કેમ ? કારણ કે પૈસાદાર એટલે કે ધનવાન બનવા માટે મહેનતની સાથે સાથે સ્માર્ટ સ્ટ્રેટેજીની પણ જરૂર હોય છે અને આના માટે તમારે કેટલીક એવી આદતો છે જે છોડવી જ પડે છે. ‘ઈંક’ નામની એક કેનેડિયન રિસર્ચ કંપનીએ આવી સાત આદતોને ટાંકી છે. જે તમને અમીર બનતા રોકે છે. તો આવો જાણીએ એ સાત આદતો વિશે…

વાતચીત કરતા શીખો, સ્માર્ટ ડીલ કરતા શીખો

કોઈપણ બાબતને લઈ ભાવ-તાલ કે વાતાઘાટ કરવાની અક્ષમતા કે તેનાથી દૂર ભાગવાની આદત તમને ગરીબ બનાવી રાખે છે. ઉ.દા. તરીકે તમે કોઈ જગ્યાએ નોકરી કરવા જાઓ છો. જ્યાં તમે કોઈપણ કારણસર તમારી સેલરી અંગે બાંધછોડ કરો છો અને જેટલી ઓફર થાય છે એટલામાં માની જાઓ છો. આવું મોટા ભાગે પહેલી નોકરી દરમિયાન થતું હોય છે. મોટા ભાગના લોકો તે વખતે સેલરી એટલે કે પગાર કરતા નોકરીને વધુ મહત્ત્વ આપે છે. જે આગળ જતા તેને બહું મોઘું પડે છે. જો આપણને આપણી આવડત અને અનુભવ પર પૂરો વિશ્વાસ છે તો આપણે તેના પ્રમાણમાં ઓછી સેલરીમાં કામ કરવા શું કામ રાજી થવું જોઈએ ? આ વાત માત્ર નોકરીમાં જ નહીં કોઈપણ બાબતે તમને વાટાઘાટો કરતા આવડવું જ જોઈએ.

આવકના મલ્ટીપલ સ્રોત અંગે વિચારો

આ આદત મોટભાગના લોકોમાં હોય છે. મોટાભાગના લોકો માત્ર નોકરી કરીને જ બેસી રહે છે. જો તમારે ખરેખર તમારી આવક વધારવી છે અને બે પાંદડે થવું છે તો તમારે માત્ર નોકરીના સહારે બેસી રહેવાનું છોડી આવકના મલ્ટીપલ સ્રોત અંગે વિચારવું જ પડશે. રખેને તમારી નોકરી છૂટી ગઈ કે ધંધો બંધ કરવાનો સમય આવ્યો ત્યારે તમારી પાસે બેકઅપ સ્ટ્રેટજી હશે તો બહુ વાંધો નહીં આવે.

કોઈ સાઇડ બિઝનેસ, રેંટલ પ્રોપર્ટી કે પછી આવકનું અન્ય સાધન કે સ્રોત જે તમારા ખરાબ સમયમાં તમારી પડખે તો ઊભો જ રહેશે. પરંતુ સારા સમયમાં વધારાની આવક પણ રળી આપશે.

ખુદ પર રોકાણ કરવું

ખુદ પર રોકાણ કરવું એ સુપર ઇન્વેસ્ટમેન્ટ છે અને આ સ્વઇન્વેસ્ટમેન્ટ એટલે કે ખુદને વધુ કુશળ બનાવવો. તેના માટે તમારે વધારેમાં વધારે જ્ઞાન અને વધારેમાં વધારે સ્કિલ વિકસાવવાની છે અને વધારેમાં વધારે અનુભવ પણ મેળવવાનો છે. જો આ ગુણો તમારામાં હશે તો તમે તમારા રોજગાર અને વ્યવસાયમાં ચાર ચાંદ લગાવી દેશો. તમારી આવડતમાં વધારો થવાથી તમારામાં ગજબનો આત્મવિશ્વાસ આવશે અને ભારેખમ નિર્ણયો લેવામાં સરળતા રહેશે. જે તમારા માટે અનેક ક્ષેત્રમાં હાથ અજમાવવાના દ્વાર ખોલી નાખશે.

જેવું ચાલે છે તેવું ચાલવા દો – આ નહીં જ ચાલે

મોટાભાગના લોકો જ્યારે પોતાની કારકિર્દીની શરૂઆત કરે છે ત્યારે ઉત્સાહથી છલોછલ હોય છે. પોતાનું સ્થાન, સેલેરી વગેરે માટે સતત સંઘર્ષ કરતા હોય છે, પરંતુ જેમ જેમ સમય જાય છે તેમ તેમ આ ઉત્સાહ, એ એનર્જીનું જાણે કે બાષ્પીભવન થઈ જાય છે અને ગાડી જેમ ચાલે છે એમ ચાલવા દો ના પાટે ચડી જાય છે. જે તેમના અમીર બનાવની ગાડીને પાટા પરથી ઉતારી દે છે. કામ – વ્યવસાયમાં સતત નવું કરતા રહો, નવું નવું શીખતા રહો તમારું કામ માત્ર પૂરું કરવા માટે ન કરો. કામને શ્રેષ્ઠ બનાવવા કરો.

પરિસ્થિતિ સાથે સમાધાન કરવાને બદલે પરિસ્થિતિને બદલવા અંગે વિચારો અને મહેનત કરો. આ ધગસ તમને અમીર બનવાનું ગ્રીન સિગ્નલ આપશે.

બચતની જગ્યાએ રોકાણ કરો

લોકો પોતાની બચતને હાથ અડાડતા ગભરાય છે અને તેનું અન્ય સોર્સમાં રોકાણ કરતા ખચકાય છે. જોખમ લેતા નથી. ભાઈ આમ થશે તો તમારી બચત તો કદાચ બચી રહેશે, પરંતુ તે વધશે તો નહીં જ. ત્યારે સમજદારી એમાં જ છે કે, તમારા પૈસાને વહેતો રાખો. તેમાંથી અન્ય આવક ઊભી કરવા અંગે વિચારો. તેના માટે તમે સ્ટોક્સ, મ્યુચ્યુઅલ ફન્ડ, બોન્ડ્સ વગેરેમાં રોકાણ કરી શકો છો. જે તમારી વધારાની આવકના સ્રોત બની શકે છે. આ સિવાય પણ તમે તમારી બચતમાંનો અમૂક ભાગ ખુદને વધુ કુશળ બનાવવા પર ખર્ચી શકો છો. નવું શીખવા કે સ્કિલ ડેવલપ કરવા માટે.

લક્ષ્ય મેળવી લીધું એટલે દુનિયા પૂરી થઈ જતી નથી

જીવનમાં લક્ષ નક્કી કરવું જરૂરી છે અને બધા જ લોકોએ કોઈકનું કોઈ લક્ષ્ય તો રાખવું જ જોઈએ અને આપણે તેના માટે મહેનત પણ કરતા હોઈએ છીએ. પરંતુ મુસીબત ત્યારે થાય છે જ્યારે આપણે લક્ષ્ય સુધી પહોંચી જઈએ એટલે ગંગા નાહ્યા હોવાનું માની બેસી જઈએ છીએ. અરે ભાઈ ! લક્ષ સુધી પહોંચ્યા એટલે દુનિયા ખતમ થોડી થઈ જાય છે. આપણી આ જ વિચારધારા આપણી પ્રગતિને રૂંધાવી દે છે. એક લક્ષ્ય પૂરું થયું તો તરત જ બીજું નક્કી કરી લો. બીજા બાદ ત્રીજું આપણે ખુદને ન તો ક્યારેય રોકાઈ જવાનું કહેવાનું છે કે ન તો આપણા લક્ષને પામવાના પ્રયત્નોને રોકવાના છે.

જરૂર કરતા વધારે વફાદાર બનવાની જરૂર નથી

ક્યારેક ક્યારેક એવું થાય છે કે, આપણે જ્યાં કામ કરતાં હોઈએ છીએ તે કંપની કે ટ્રસ્ટને આપણું તન મન સમર્પિત કરી દઈએ અને તેના માટે હદથી વધુ વફાદાર બની જઈએ છીએ. આપણી કંપની માટે વફાદાર હોવું એ ખોટું નથી, પરંતુ જરૂર કરતા વધારે વફાદારી તમારી પ્રગતિમાં અવરોધ પેદા કરશે જ. જ્યારે આપણને ખબર છે કે હવે આ નોકરી આપણને અમુક હદ પછી વધારે આપી શકવાની નથી તો પછી તે નોકરીને વળગી રહેવાની શી જરૂર છે ? આવું જ્યારે લાગવા માડે ત્યારે અન્ય કોઈ સ્રોત તરફ વળવામાં કશુંજ ખોટું નથી. અવસર મળે તો તેને નજર અંદાજ કરવો એ વફાદારી નહી, બેવકૂફી છે. તમારી વફાદારી એક હદ સુધી સારી છે, પરંતુ તે વફાદારી તમારી પ્રગતિને રૂંધવા માંડે ત્યારે તમારે તે અંગે વિચારવું જ રહ્યું.